"يوميات سوسة فى بيطرى المنحوسة"........ الحلقة التانية

الاول يا جدعان بحذررررررررررررركم من تطنيش التاج البوست اللى ورا البوست دة علطول محدش بقى يقول مشافهوش ويطنش ولا يقول الموس كان مهنج ومعرفتش انزل بالصفحة لتحت ههههههههههههه دة تحذير من سوسة لكل من تقع عيناة على المدونة ومتقلقوش كل واحد يجاوب التاج لية عندى عرض اتنين شامبو وواحد كريم .........

انتهينا فى الحلقة السابقة من امتحان اللحمة وامتحان تكنولوجيا الالبان .....ولكن سوسة قررت تطلعكم من مود الامتحانات الممل الى تلك الحلقة النتاوية الاذاعية ومعاكم على الميكرفون سوسة تتحدث .........

النهاردة بقى هسترجع مشوار مش هنساة طول عمرى اللى هو " رحلة الى المجزر الالى فى البساتين" الحقيقة يا جدعان دى مش رحلة يوم ونرجع ولا هو مصيف وهيفتحولنا الكافية لا دة سكاشن العملى بتاعة اللحمة ...... هتقولولى لحمة لحمة مفيش فراخ ؟؟؟ اقولكم الفراخ جاية بس حلقة تانية يا بشر

المهم يا جماعة قال فى سكشنى قالوا تطوع كدة العيال هيلموا مننا ويتفقوا مع اتوبيس واهو بدل البهدلة بس للاسف طلع كلام وظلت المشكلة الا احنا هنركب اية بقى عشان نوصل للمجزر دة ؟؟؟؟؟؟؟

المهم اتفقنا ثلاثة شلتنا الكريمة اننا نتجمع عند كليتنا ونروح سوا لاننا مش عاوزين نتوة .........واللى حصل يومها الصبح صحيت متاخر وطبعا ركبت عادى من اكتوبر للجيزة والطريق كان واقف كالعادة .......انا بقى محبتش احس بالخوف نظرا لان الكل كان بيقولنا عبارة واحدة " اوعى تيجى لوحدك لمواااااااااا بعض" بس انا تجاوزت الموقف حينما علمت ان صحابى وصلوا المجزر اصلا وانا لسة واصلة الجيزة عند كليتنا ........ رحت اركب السيدة عيشة كالوصف ومن هناك قالوا اركب قطامية فانا لقيت حاجات نازلة المقطم قولت انا مش فاكرة قطامية ولا مقطم ........ شكلهم واحد ورحت راكبة مقطم ......طبعا هتسالوا متصلتش اسال العيال لية ؟ هقولكم تليفوناتهم كانت مقفولة فسلمت امرى لربنا خصوصا ان فى اكتر من حد قالى اركبى مقطم .......وبالفعل ركبت وكلة كويس..... هتسالونى برضو مسالتيش السواق لية قبل ما تركبى ؟ هقولكم ان مفيش فرصة للسؤال يا تلحق مكان يا تسال ....فانا قولت الحق مكان هههههههههههه

المهم فى السكة بسال بقى السواق لقيتة بيقولى مجزر اية ؟ لا مش رايح هناك انزلى هنا ............

طب انزل اركب اية؟؟..... قالى عدى الناحية التانية واركب القطامية

المهم نزلت وانا فى قمة السعادة دة معناة انى اتاخرت على السكشن وترددت فى ذهنى عبارة " اوعى تروحوا لوحدكم لمواااااااااا بعض" زى ما اكون مقبلة على الذهاب لرحلة لسجن ابو غريب بس للاسف ام غريب وابو غريب سابوا السجن وروحوا وبقيت وحدى ..............

وصلت بالفعل المجزر ومش عاوزةاقولكم اول ما جيت اقول للسواق "المجزر لو سمحت"

لقيت العربية كلها بتتفرج عليا فانا عليت صوتى قولت خدوهم بالصوت .........هههههههههههه

جاية ادخل لقيت الحرس على الباب بيقولى انتى بيطرى ؟

اة وفى سرى بقول يعنى اية هيبهدلنى اجى هنا اكيد مش جاية سياحة

المهم اخد اسمى عشان الغياب ولسة هدخل

لقيتة بيقولى استنى يا دكتورة لو اشوف حد من الدكاترة يدخلك

طبعا مكنتش عارفة لية هيجرى اية يعنى ؟

المهم فجاة الاقى عينى لقت العيال بتوع دفعتى واحس انى كانى عيل صغير لقى اهلة وفجاة الاقى شلة الكرسى الاخضر

عواطف : كنتى فين قلقتينى عليكى ؟

سوسة : مفيش يا بنتى اتاخرت فى النوم

عواطف : خليكى معانا بقى

سوسة : طبعااااااااااااااااااا

واذ بالدكتور يحادثنا عن قواعد المجزر ................. شوفوا بقى الهنا اللى احنا فية

شوفوا يا ولاد قبل ما نعدى على العنابر او اقول اى حاجةتبع المنهج فى قواعد للمجزر (كان دكتور دمة خفيف جدااااااااااا ومحسناش فعلا بالوقت وفهمنا كويس اوى)

قواعد للبنات::::::::::

اولا اوعى تيجى متشيكة تيجى بااقدم هدوم عندك والاحسن بنطلون عشان حر الحركة ( تساؤل طب يعنى واللى مش بيلبس بنطلونات يعمل اية ؟ يقولنا جيبة مش طويلة ....... طب انا بقى محبش غير الجيب الطويلة ولازم تجر فى الارض ههههههههههه ............ يقولنا يبقى هدومكم هتبوظ وتيجى على دماغكم ............انا اعرف كل هدوم الواحد باظت اصلا يلا كلة عند ربنا

ثانيا : متحطيش ميكاب يا اختى ......... مش هيجى حد من هنا يخطبك

ثالثا : تمشى مع صحابك ومعايا واوعى تسيبينا اوتمشى لوحدك لان لوحد خطفك هنا مش هنعرف نجيبك و طبعا مترضيش للدكتور ان عيالة يتيتموا بدرى بسببك احنا فى المدبح

قواعد للشباب:::::::

اولا لو زميلتك اتعاكست اوعى تاخدك الشهامة وترد على اللى يعاكسها لانوا ياما جزار يا صبى معلم وفى كل الحالات هتبقى الخسران واحنا كمان وبعدين ما زميلتك بتتعاكس برة فى الشارع فالاولى تتعاكس فى المجزر دة الطبيعى

ثانيا اياك تمشى مع اللى مرتبط بيها يعنى جروب ولاد بس وجروب بنات بس عاوزين تناقشوا موضوع برة المجزر

ثالثا ركزززززززززززززززوا معايا

كان يوم يلهووووووووووز دخلنا على العنابر

اول عنبر جاموس

تانى عنبر بقرى

تالت اغنام

دول كانوا الى حد ما يعنى المشكلة بس ارضية الدبح بتزحلق فكنا بنمشى بالراحة وخايفين لان الزحلقةهنا هيكون فيها بهدلة لللهدوم من الدم بتاع المجزر كنا ماسكين فى بعض وبنفذ التعليمات دة غير انك مطالب تستحمل رخامة الجزارين ومرة واحدة تلاقى حد معدى من جنبك بسرعة بدبيحة ويضحك لانوا استطاع اخافتك ههههههههههههه انسان سخيف

طبعا خلى بالك من راسك لان الدنيا كلها خطاطيف وانت بقى ومصلحتك عشان متطلعش بعاهة

رابع عنبر كان بتاع الخنازير يععععععععععععععععععععععععععععععععع

من ايام التشريح وكنا بنشرح الحيوان المقرف دة بس المجزر نقلة تانية هنا القرف بعينة ......والدكتور بقى لازم يدخلنا واحنا هنموت من الريحة وطلعنا لقينا الدكتور بيقولنا هنعدى على المعمل دةمعمل فحص للحمة بتاعة الخنزير من الدودة الشريطية عشان يتاكدوا من خلوها منها وللعلم تقريبا اغلبية الدبايح فيها ان مكنش كلها وتقرير االفحص لو لقينا فيها الدودة ........... الاعدام لكامل الدبيحة مش الجزء اللى لقينا فية الدودة بس ....... حتة بيطرى ههههههههههههه

طبعا فى نهاية اليوم بيجى المراجعة تلاقى بقى عامل القسم ماسك جرادل فيها خيرات ربنا فشة على كرشة على قلب وحتتين كبدة بس الاعضاء مقارنة فيها بين كل الحيوانات يعنى ازاى اعرف دة قلب انهى حيوان من شكلة وازاى اتعرف على المرض اللى فية بالعين المجردة

ونررررررررررررررروح بقى ....... ازاى نروح واحنا جيش كل دول طالعين من المجزر ونفس المعاناة نركب للسيدة عيشة ومن هناك جيزة والعيال صحابى ساكنين فى الجيزة فتتبقى العبدة للة الماسوفة على شبابها لتركب اتوبيس اكتوبر ساعة ونص مواصلات بعدكل المعاناة دى .................. وعجبى

فاصلللللللللللللللللللللللللللل اعلانى ونعود .............. اتفرجوا على بقية المدونة انتم جايين تلعبوا يعنى واعمللولكوا همة كدة وادونى تعليقات على بقية البوستات عبال ما نرجع ..........

عدنااااااااااااااااااااااااااااااااااااااااااااااااا انت يلا انتى يا بنتى اوعى تكونوا معلقتوش على البوستات التانية امال انا مدياكم ريست لية يعنى ههههههههههههههههههههههه.........

بما ان كليتنا كلية الشقاء والتعب وبما ان البنات بيخافوا يعنسوا ويقولوا ضل راجل ولا ضل شمسية فلقيت اغلب الناس بيتجوزوا يعنى لو خامسة اضافى زى حالاتى وفى سنة ولا اتنين زيادة بيتبعوا مبدا " اتجوزى تتستتى ...وكام عيل تخلفى ...... ولو اتبقى وقت زاكرى واخلصى ولو محصلش يبقى استنى عيالك ومعاهم اتخرجى " هههههههههههههههه بس الصراحة انا مش معاهم فى المبدا الغريب دة

المهم واحدة صديقتنا اتجوزت وعملت بالمبدا وفعلا جابت واد صغنن عسللللللللللل وانا وشلة الكرسى الاخضر قولنا نعمل حضانة على الضيق مساهمة منا لجميعة حديثى الزواج من اخواتنا والصراحة انا اصلا بحب الاطفال اوى وبحب العب معاهم اوى فالموضوع كان عاجبنى فى ايام الامتحانات بين الامتحان النظرى والشفوى اصل كدة كدة الواحد مش هيزاكر ما بينهم اللى اتزاكر اتزاكر فى النظرى

اممممممممممممممم .........الحلقة التانية انتهت لحين اشعار اخر ولحلقة اخرى .....................الى اللقاء

صحيح بقولكم اية ......اية رايكم فى فكرة اليوميات دى ولا نعملها فيلم احسن ههههههههههههه؟ برخم عليكم برضومعلش

يااااااااااااااااااا بشر الناس اللى ليها تاج عندى تنبية هام اسئلة التاج هى الاسئلة اللى تحت عن السعادة والشعور التاج دة تاج واحد مش تاجين يعنى متجاوبوش على التاج اللى انا جاوبت علية انا جبتلكم اسئلة تانية من سلاح التلميذ والاضواء..................ههههههههههه