CLICK HERE FOR THOUSANDS OF FREE BLOGGER TEMPLATES »

29 يوليو 2008

يوميات سوسة ... قبل بيطرى المنحوسة ... الحلقة السادسة




النهاردة انا هتكلم عن سوسة قبل بيطرى ..... تلك الفتاة التى كانت تقدس الصداقة لابعد الحدود ولازالت ... هتكلم عنك يا زينب بعد ما مر على انتهاء صداقتنا سنين وسنين لكن لسة فاكرة كل حاجة فى صداقتنا واكتر حاجة فاكراها انك واحشانى اوى ..... اية مود الاكتئاب دة هههههههههه وبعدين الصراحة برضو يا زوزو انى لسة فاكرة مواقفنا الحلوة بس مسحت من دماغى الجرح كل ما اشوفك فى خيالى افتكر الحضانة وحفلات المدرسة ونشاط الموسيقى ...... كنتى بتحقدى عليا عشان كنت بغنى هههههههه ما انا برضو كنت بحقد عليكى عشان بتعرفى تعزفى على الارج والاوكرديون .... فاكرة لما كنا بنعمل مقالب فى العيال ههههههههههه كنت البيج بورص بتاع الشلة .... اكبر موردة للبمب والصواريخ .....فاكرة الصاروخ المعجزة اللى جبتة هههههههههه كنت مؤذية موت هههههههههه وقدام المدرسين بعد ما اخطط لخطتنا ابتسم وبراءة الاطفال على وجهى الماكر .........ههههههههههه






عارفة يا زوزو كل ما اروح السويس امسك التليفون واقول هكلمك اصل رقمك محفور فى دماغى زى ما انتى مرسومة فى طفولتى وصورتك على قلبى ....... دايما كابسة على نفسى كدة ههههههههههه ....... واول ما امسك التليفون اسيبة ........ حاولت اسامحك كتير بس اعمل اية معرفتش ....... انا عرفت انك اتخرجتى وفرحتلك اوى وكنت عاوزة ابعتلك الخاطرة اللى عملتهالك مخصوص ... عارفة كنت بشترى كل سنة بعد ما سيبنا بعض فى يوم عيد ميلادك كادبورى كنت بحبها عشانك وكنت بجيبلك كارت واكتبلك خاطرة واقولك قد اية واحشانى وافوق من الاوهام الاقى اننا معدناش صحاب ........






ندخل فى المسلسل بقى ....... تانية ثانوى ....... الترم التانى ...... يوم مش هنساة ..... صحيت الفجر كالعادة دخلت اصحى ماما زوزو .... حطيت براد النسكافية على البوتاجاز ....... لميت الغسيل ياااة زوزو شكلها تعبانة اوى هى بس لو تسيبنى اعمل انا الاكل الاسبوع دة بس برضو مش هترضى ........ لميت كتبى وحطيت معاهم حاجة الكيمياء عشان اراجع وانا فى المدرسة عندنا امتحان النهاردة ومش عاوزة البت بطوط تجيب اكتر منى ههههههههه مع انى كنت انا وبطوط بنتنافس كنا اصحاب جداااااااااااا ولو انها طلعت اشطر فى الاخر ودخلت طب بشرى السوسة ههههههههههه






ماما زوزو : صحيتى يا سارة ؟






سوسة : اة يا زوزو ادخلى نامى يا عسل






ماما : لا انا عندى شغل ......... انا مرضتش انام الا لما تنامى عشان اشجعك






سوسة : يا زوزو هزعل انتى نامى انا عارفة مصلحتى كويس وبعدين لا تقلقى هجيبلك النهائية واجى ههههههههههه






ماما : ربنا معاكى يلا خدى سندوتشاتك وخلى بالك من نفسك






سوسة : سلام يا زوزو






فى المدرسة ...........






زينب : معدتيش عليا النهاردة لية نروح المدرسة سوا






سوسة: اتاخرت فقولت اكيد مشيتى يا زوزو






زينب : ذاكرتى كيمياء كويس ؟






سوسة:تمام ....... متغيرى المدرس بتاعك دة ...... المدرس بتاعنا احسن






زينب : لا انا اخدت على المدرس دة






سوسة: هخلص الامتحان والدرس واجيلك عشان درس العربى






زينب : صحيح عاوزاكى تشرحيلى البلاغة عشان انتى فاهماها






سوسة : من عنيا ... صحيح مش فاكرة النهاردة اية ؟






زينب : النهاردة الاربع






سوسة : اة صحيح الاربع ...... ثوانى ...... خرجت شنطة هدايا حمرا من شنطة المدرسة






زينب : جايبالى هدية ؟






سوسة :النهاردة عيد ميلادك ........كل سنة وانتى طيبة يا زوزو






زينب : وانتى طيبة يا سوسة ... انتى الوحيدة اللى افتكرتى انا نفسى كنت ناسية






سوسة : مينفعش انسى يا بنتى ........افتحيها بقى






زينب : ايةدة دة البيرفيم اللى كنت عاوزة اجيبة ..... اة صحيح يوم ما خرجنا انا قولتك انى عاوزة اشترية





المهم انى رحت عشان درس الكيمياء بعد المدرسة بس المستر لغى الدرس اصلا انا قولت افوت على زينب الاول قبل ما اروح اخد منها كتب كنت سايباها عندها





طلعت على السلم جرى المهم وصلت لباب البيت لسة هخبط على الباب ايدى اتجمدت فى مكانها لما سمعت الكلام ..........





يا ماما انا اتخنقت من سارة ..... عاوزة تبان انها مثالية اوى .... وبعدين هى مش احسن منى ॥ وبعدين انا بكرها .......





نزلت على السلم منهارة كل اللى فاكراة صوتها وهى بتقول بكرههههههههههههههههههههها .......... روحت البيت مصدومة دخلت اوضتى ومكلمتش حد ...... ماما دخلت تكلمنى قولتها مفيش..... وفجاة لقيت التليفون بيرن .......ماما راحت ترد ولقيتها بتنادى عليا





ماما : تعالى يا سارة كلمى زوزو





الو اية يا سوسة مش جايةدرس العربى .... انا قلقت عليكى يا بنتى





مكنتش عارفة اتكلم ولا حتى اعيط ....... ياااااااااة كل دة جواكى ناحيتى وبتمثلى انك انتيمتى يعنى طب بتمثلى بقالك اكتر من عشر سنين ازاى ؟ وقفلت السكة ........ معرفتش اتكلم ...... ومرضتش اتكلم ..... وماما فهمت وبعد فترة حكتلها .... شلت زينب من حياتى ...كان قلبى بينزف ازاى الناس بيجرحوا اعز اصحابهم كدة بمنتهى السهولة ؟!.......حولت حياتى من عندك يا زينب بس الجرح لسة مكانةموجود ... اخدت فترة بعدك لوحدى مش عشان انتى مشيتى من حياتى ..... عشان كنت خايفة كل الناس يبقوا زيك بيعرفوا يمثلوا الصداقة والاخلاص ومن جواهم كراهية واحاسيس مش قادرة افهم سببها .... طب كنتى ادينى سبب واحد لكرهك ليا ؟




اخدت هى فترة تحاول ترجع صداقتنا بس معرفتش ....... اصل انا كدة لما بحب حد من صحابى اوى بسامح كتير بس معرفش اغفر الكدب والتمثيل ..... ممكن اسامح على اى حاجة الا الكدب ...... وبعدها بفترة هى صاحبت ناس تانيين ونسيت ..... بس انا عمرى ما نسيتها ولا عمرى هنساها........



الى اللقاء فى الحلقة القادمة ..... انتظروا سوسة فى ثوبها الجديد ههههههههههههههه ........ سلاااااااااااااااام .... صحيح الصورة اللى موجودة مع البوست للسويس ........ عشان تعرفوا السويس حلوة ازاى ...........