"يوميات سوسة فى بيطرى المنحوسة"........ الحلقة التالتة

الحلقة السابقة شاهدنا الاخت سوسة فى المجزر ......بوحة صبح صبح يا عم الحاج هههههههههه ........ والمواقف الكوميدية المرافقة والان فى هذة الحلقة النتاوية الجديدة من مسلسلى اللى كلمة فى سركم بتوع ام بى سى فور عارضين عليا فية مليون ليرة لبنانى بما ان الليرة عملة ليها وزنها ههههههههههه بمعنى تانى كام جنية مصرى افيد واهو نشترى بيهم اتنين كيلو طماطم قبل ما تغلى اكتر وبما انكم اكيد اتخنقتوا من مسلسل نور واخواتها هتلاقوا مسلسلى اظرف انا رشحت كام بطل وبطلة منهم الاخ توتو حسنى ...... الاخت زينة رمضان ..... مع الاعتذار ليهم انا مقصدش اعيب على حد انا بهزر بس ههههههههههههههه

الحلقة دى بقى سوف نتحدث عن اقسام تتحدى الملل ااقصد تتحدى المزاكرة انا معرفش لية بس اهو........... تعالوا نبدا بالولادة قسم زى الفل حل كويس حل وحش اكيد هتشيل مرة ولا بتاع ولو مقفل الورقة ممكن يا تنجح على الحركرك يا ترسب زى الجماعة اللى مسمينهم "تخلفات" واللهى ما متخلفين ولا حاجة بس الحظ بقى وبما انى اتحجزت مع جماعة التخلفات فمن موقعى هذا بقولكم الشيل فى بيطرى للجدعان ودة دليل على سلامة عقلك من الحفظ والرغى وبعد فترة هتلاقى نفسك اتحولت لعبقرى وهتمشى فى اتجاة تانى خالص غيرالطب الا وهو الثقافة هتلاقى نفسك رايحة تعمل اشتراك مكتبة عامة وناوى السنة اللى بعدها تنتخب نفسك فى امتحانات الاتحاد ولو انك هتسقط فى الانتخابات دى يعنى هتسقط لو مالكش قفا ااقصد ضهر اهو كلة واحد هههههههههههههههه اية التهييس دة .........

مرورا على قسم الكيمياء حبيب هارتى من جوة ومستربع على قمة البيركارديم (غلاف من اغلافة القلب من الخارج ) اهو بترجم عشان متقولوش نسيت شريط الترجمة وقريب هدبلج المسلسل اشمعنى يعنى الست نور وعم مهند احنا احسن برضو وهننافس ههههههههههههههه

الكيمياء دى بقى اللى عقدتنى فى الكلية مع انى واللهى كنت متفوقة فيها فى ثانوى وجايبة فيها النهائية بس هنا الكيمياء هنوريك اللى عمرك ما شوفتة هههههههههه وكام سلام لقسم الكيمياء وبقولهم انتم خلتونا نطبق القاعدة القائلة " مش هتطلع من الكيمياء الا على المعاش ...... وادينا بنلعب فى فترة التقاعد وماخدناش برضو المعاش "

يوم عادى زى اى يوم مش فاكرة تاريخة لانوا يوم بيطراوى اصيل ...... معرفش حسيت انى عاوزة اتشيك اوى معرفش لية رحت لبست احلى طقم عندى ونضارة شمس ماتريكس يعنى هههههههههههه نزلت الكلية اليوم بدايتة مواصلات اكتوبر وما ادراكم هذا المشوار الطويل اللى اخدت علية و لقيت نفسى كدة عشان اهرب من الوقت طلعت كتاب كنت جايباة من مكتبةمبارك شعر لفاروق جويدة ديوان اسمة "لانى احبك" وطبعا لشدة حبى لفاروق جويدة اندمجت اوى فى القراية وسرحت فعلا واذ بى فجاة الاقى اللى جنبى بتكلمنى وبما انى محبش حد يطلعنى من سرحانى بالعافية حاولت اتبع قواعد التطنيش والتنفيض ومفيش فايدة رغاية اوى ..........

اللى جنبى : انتى فى طب ولا صيدلة ولا اسنان ؟( خدت بالها من البلطو بتاعى متعرفش ان لية استخدام اخر عشان نفرشة على الارض ونقعد علية )

سوسة : ولا حاجة من اللى فاتوا

الحاجة اللى جنبى : تبقى علاج طبيعى

سوسة: سمعتى عن طب بيطرى ؟

الحاجة اللى جنبى :يااااااااااة انتى مجبتيش مجموع تربيةحتى

سوسة : طبعا مرارتى اتفقعت اية مسمعتيش عن ان بيطرى كلية قمة برضو وطب ؟

الحاجة : بجد ؟؟؟؟؟؟؟؟؟؟؟؟؟؟

سوسة: قولت عشان مخنقهاش اتحجج انى هكلم صحبتى فى التليفون

ترن ترن ترن ترن ........... ردى يا عواطف يا هبلة .........ردى بقى وارحمينى من التحفة اللى طالعة ازالة اللى جنبى ............

مفيش رد ........... حسابك معايا لما اجيلك

الحاجة : صحبتك دى بيطرى برضو ؟ مجبتش مجموع برضو؟

سوسة: عملت نفسى نايمة

الحاجة: اوعى تنامى فى المواصلات بيقولوا خطر على البنات ........ عشان ممكن حد يخطفك

سوسة : مقدرتش امسك نفسى من الغيظ .......... يا ستى انا عاوزة اتخطف

الحاجة : شكلك فى مشكلة مضايقاكى احكى احكى

سوسة : نظرت لها شذرا وسكت

الحاجة : يااااااااااااة دة انتى مضايقة اوى تلاقيكى زيى مبتعرفيش تفضفضى بس احب اقولك دة غلط انا تعبت فى الاخر وقررت اتابع مع دكتور نفسى

سوسة : كمان مجنونة يا ربى ارحمنى

الحاجة : طلعت شوية ورق واذ فجاة الاقى كلمتين لفتوا نظرى ............ " مستشفى العباسية للامراض النفسية والعصبية"

سوسة : سكت خالص وبعدت عنها اوى

الحاجة : انا مش مجنونة واللهى زى ما بيقولوا اة انا بقولك اهو

سوسة : سكت اكتر والخوف كان هينط من عنيا

الحاجة : كل اللى حصل ان بنتى عصبيتنى فتنرفزت عليها وضربتها بس ماتت معرفش ازاى هى ماتت

كنت لسة فى شارع الهرم اول الشارع رحت قولت للسواق لو سمحت على جنب ونزلت عشان كنت خايفة منها اوى بس اول ما نزلت لقيت تعبيرغريب على وش الست ضحكت ضحكة المنتصر اما انا فحمدت ربنا انى نزلت اصلا ...........

كان يوم فلة قولت لازمتها اية اتشيك ههههههههههههههههه ووصلت الكلية بترعش واول ما لقيت عواطف جريت عليها وعيط ااااااااوى معرفش لية هواحنا لية بنخاف من المجانين ؟ ولا يمكن انا اكتر خفت لما قالتلى انها موتت بنتها بس هى لية قالتلى كدة وكانت اكتر حاجة غيظانى لما ضحكت انى نزلت حسيت ان الولية دى انتصرت عليا ................. هههههههههه والى لقاء اخر مع طرائف المواصلات

فاصل اعلااااااااااااااااااااااااااااااااااااااااانى ونعود و بقولكم تانى متضيعوش وقت وروحوا علقوا على باقى البوستات ........شوية وهنزلكوا فشار وتسالى واللهى المسلسل دة خرب بيتى يا جدعان ..................

اعلان بيطرى :::::::::: تعلن كلية طب بقرى جامعة ابو ديل عن وجود وظائف فارغة بها ...... مطلوب عدد اتنين دكاترة دمهم واقف فى اشارة طويلة ....... تلاتة طلبة متخصصين فى فنون الغلاسة والتناحة وتطفيش الطلبة من المدرجات ماشيين على مبدا حضور لا فشل اة ...........

عدناااااااااااااااااااااااااا .......... بقولكم اية انا دلوقت حالا واقعة تحت تهديد بطوط اختى عاوزة تنزل تشترى جيبة وطبعا العبدة للة هتتكسح لانها هتنزل تلف فى شوارع وسط البلد معاها لغاية ما تموت ..................

بس برضو هكمل المسلسل .........

فى امتحان الجينا( الولادة بالعربى ) عشان متقولوش نسيت الترجمة ههههههههه الشفوى لا انسى هذا الموقف ابدا .......... دخلت للجنة ملغمة بالدكاترة اللى طبعا على عينى وراسى ......... وداخلين طبعا لقينا كلة بيبصلنا بقرف ابص على هدومى مالى ما انا كويسة اهو لا بشد فى شعرى ولا حاجة

الدكتور الاولانى : ادخلوا يا بنات ...............

الدكتور التانى : انتم خامسة اضافى ؟

الدكتور التالت: ما تردوا ؟

احنا بقى كنا بثلاثتنا شلة الكرسى الاخضر ...... يعنى انا مش عارفة تلات دكاترة بيتكلموا فى وقت واحد اية هنرد ازاى ........... ولسةطالعين من امتحان نظرى زى الطين وعملى وحش اوى

المهم قعدت انا يلينى عواطف ثم فتكات ............

الدكتور : واحدمن التلات دكاترة ....... انتم متجوزين ؟

سوسة : طبعا انا كنت طالعة نايمة من النظرى والعملى مطبقة يومين من غير نوم بس السؤال صحانى ...........

سوسة: لا يا دكتور

الدكتور : وصحابك ؟

سوسة : لا برضو ........ اية شكلة جايبلنا عرسان ولا اية ؟ طب كان قالى كنت لطشت وشى باحمر واصفر وازرع ملوخية ناشفة فوق عينى .......... ههههههههه

الدكتور : زى ما يكون حس باللى بيدور فى دماغى ......... اصل صحابكم اللى فاتواا كانوا لجنة حوامل ............والدكاترة التلاتة ادوها ضحك............

احنا بقى فضلنا مسبهلين وبقول فى سرى وانت مالك يا غتت

بداوا بقى رخامة الاسئلة .............. مهو دى استراتيجية التطفيش انهم يحرقوا دمك بكلمتين فى الاول يليهم اسئلة غباء اجتماعى وفى الاخر خطة تهزيق محكمة .......... انا بقول برضو شكلهم كلهم دخلوا جيش محدش فيهم طلع اعفاء

وبعد التهزيق والذى منة فى الاخر واحنا خارجين من اللجنة

" ربنا يكرمكم وتتجوزوا بقى "............ هو حد اشتكى ليكم ...........

يرد علية الدكتور التانى " هيفضلوا اهاليكم يصرفوا عليكم لغاية امتى ؟

اللى بعدة " روحوا زاكروا بقى "............

وانا بقى من كتر حرقة الدم رزعت الباب ورايا من خنقتى .................. الحمد للة نجحت فى الجينا بمعجزة فى النهاية .............

هذةكانت حلقة اليوم الحلقة التالتة من مسلسلى المدبلج اخيرا "سوسة فى بيطرى المنحوسة " ........... الى اللقاء مع الحلقة الرابعة ........... واعذرونى ان مودى كتابات ساخرة واكيد ليا عودة مع الكتابات الادبية .......................سلاااااااااااااااااااااام